Kort opsomming

Leunis van Rooyen is 'n Oos-Kapenaar gebore en getoë. Hy is 'n ervare joernalis wat aan 'n paar dagblaaie, streekkoerante, radio en televisie verbonde was. Hy verdien sy brood as 'n taalpraktisyn. Hy het ook al 'n jeugroman en 'n nie-fiksie boek, kortverhale en gedigte gepubliseer.

Geweld en moord op plase in Suid-Afrika is niks nuut nie... Hierdie verhaal uit die dae nog vóór die Groot Trek vertel die geskiedenis van een van die botsings tussen grensboere en die Xhosas in die Oos-Kaap in die 19de eeu. Die oorlogswolke pak dreigend saam in die gebied.

Die Xhosas smee planne om die blanke koloniste in die gebied noord van die Katberg uit te delg... en Jack Holder word vasgevang in 'n maalstroom van agterdog, diefstal, geweld en oorlog. Die jong man van Britse herkoms is 'n Setlaarseun wat feitlik alles aan dié pioniersgrens verloor het. Hy kry ook te doen met 'n oulike boerenooi en haar onredelike pa, 'n mooi Engelse meisie wat weet wat sy wil hê, veediewe en oorlogsintrige.

Die besef dat hy die enigste is wat sy mense van ondergang kan red, is 'n verantwoordelikheid wat die beste uit Jack haal.